Heb 2 | BEF | STEP | Ya hu'ehina'mu lali laga mehina kapo legeso huto bili lalune luto ka'a keheli'ohutamo ya'ma aku'i le'mo kosaba huto amuya moloto li pili koto kehelito minalune.

Hebrews 2

Lubuto bilata nasana inomo tito mino'ehina

1 Ya hu'ehina'mu lali laga mehina kapo legeso huto bili lalune luto ka'a keheli'ohutamo ya'ma aku'i le'mo kosaba huto amuya moloto li pili koto kehelito minalune. 2 Agelomagihi enabagaguti kaga keya ka keye'ahana yanauba legeya'a lolo higo lusi kaga huto hu'ehina'mu bona'i moneuba ana agelomagihi kaga'ani hauta holatana ya'ma to keheli he'mito hega holatanamofihi hapa'a huto nohigo ya'ma foipana'a hiti ni'inaya yamofihi mone kegi'a foipana nona'a ali'ehinamo ni'ibe. 3 Ya hu'ehina'mu laliti hena huto lubuto bilatana tito mino'ehinamofihi he'minogoti buto fa'menena lolo hilina ni'ibe? To yata'a ai'a Sipi Bouba kana'amu kana'amu moloto lubuto bilatanamofihi kaga'a lu yege hoto molo'ehinamo yamofihi enegekesatu yigi hokolo hite keheli'ahana'a enali lu limi limi hago amuya molo'ehinamo ni'ibe. 4 Ya nohigo ana kanagu Hu'mau ya'ma lubuto bilatanamofihi kaga'a lusiga lu'ehinamoya ai'a fato fato suhi to amuya'amofihi nasana to topa hose'namofihi ana'ina kosaba'i to babeyafa'alo fato fato'i li huto huto molo'ehina yabe. To Hu'mau ai lu kehelito ya'ma Sikalafu'mofihi nasana amuya'a ai'a lu'ehinalo moloto guna ito limi'ehina yabe.

Yesu lubuto bilatanamofihi Sipi Bo'a nohibe

5 To me'i kosaba'na alihi huto hilina yanamofihi ka'a lali noluta ya'ma Hu'mau agelo enali kaba hilabe luto enele'mo ho tito melu epolo'ehina yabe. 6 Ya huto meni'ibe. Mono bukugu bo moneuba yamofihi ka'a Hu'mamofihi lu emi'ehina ka'a ma luto lu'ehina:

Oho, Hu'mau bona'i ya'asimaka ya'ma
henana'animu keheli epilata nohane?
To bona'i ya fa'mene hana'amagihi
henabe luto enele'mo bati huto
kaba nohane?

Yamofihi kana'a hupasi hinogo

kai bona'i lebato agelomagitoga

legege hu epolo'ahane.

Kai gihiti bomofihi gi'aloti

sekele mamu'a hiti

liyafa huse'na'a hiti

bona'magihi epi'ahatamo ni'ibe.

8 To kai bona'i enali silaga'namofihi kaba hi epalana'mu enele'mo hofa to'ahane . Ya'ma Hu'mau bona'mu silaga'namofihi kaba hi epalanamoya, ya luto lu'ehina'mu bona'magi ana'ina enamaha'aluga mele'ahana silaga'na yabe luto lu hokolo huto lu'ehina. Aku yatai kana'a ya'ma silaga nasana enamaha'aluga melete kaba hi'ahana'mu bu megolata nohune. 9 Ya huto Yesu bu go fe luto kehelilata nohune. Kana'a hupamone ya'ma agelomagihi enalitogati limito minoto Hu'mau lehe'mose'namu keke'i luse'na kehelito fili'ehina yabe. Asaga bona kumu yabe luto fili'ehina. Ya'ma fili'ehinanamofihi gabu gise'namu Hu'mau le'mo hofa tago fana meha'a hiti gi'amo li saga huse'na hiti aitoga huto hu'ehina bu golata nohune. 10 To Hu'mamofihi nasana'a silaga'i yanauba aitoga agoya hu etoto minalibe luto ana'ina silaga'i yanamofihi afo'afu lolo huto minoto ai'a panala'i pana'i silaga'i sekele mamu'a hiti fana mehena molo epalalube luto keheli'ehina. Ya nohuto Yesu kohe tose bouba enubuto bilatanamofihi Sipi Bo ai'a keke'i luse foya liloto buto li so kito minalane luto Yesuhi lu eto'ehinamofihi bati hu'ehina yabe.

11 To bona'i foipana'ani li he'mi epololata to komopa'ani le'mo bati hulata nohina bo ai hiti to enele'mo lamana hu'ehina bona'i hiti enali afo'anifu moneko'i nohibe. Ya hu'ehina'mu Yesu ya'ma yagapana'amu nogonamu tamu'nise luto lu epito keheli'ehigo buya menohibe. 12 To Yesu ai Hu'mamofihi lu emi'ehina ka'a ma luto ni'ibe:

Oho Hu'mao.
Kai kumu nogonamu tamu'nimagihi
enogobisalo ka lu epoloto,
to silaga li gehesa nehanalo
kai kumu nama luto kofokehi lilube.

13 To ai lu'ehina ka mone'a ma luto hiti ni'ibe:Hu'mamofihi keheli ule'ale huto minalube. To mone'a hiti ma luto ni'ibe:Ya'ma nani'ni hiti to Hu'mau yagapana'i nimi'ehina'a hiti lali moneko koguna asaga'i nohune.

14 To Hu'mamofihi yagapana'a enali ya'ma enugufa'ani hiti golaha'ani hiti ya'asigo minago nehanaya Yesu ana suhi huto lali lugufa to hapati li lolo hu'ehina. To ai'a nofilito ya'ma bona'i fililatanamofihi afo'afu ya'ma kaba bo, Sataha amuya'a hiti bomofihi Yesu amuya'a ho he'mito le'mo sibina hu'ehina yabe. 15 Ya'ma bona'magi fililatanamofihi enelesa lulata nasanauba asaga yupahi naga igo mine lite bite mine'ahanamagihi Yesu gulu ho epalalube luto yamofihi lolo hu'ehinamo ni'ibe. 16 Yamofihi nasana ya'ma agelo enele'mo bati huto ya enali'ani'mu enehe'malatafihe? O'e, ya huto meni'ibe, lali anokehelune.Ai'a Abalahahi panana'a lali lele'mo bati huto lehe'molata nohibe, lite mono bukugu fayahi keye'ahanamo ni'ibe. 17 Ya hu'ehina'mu Yesu ai lali'i mamufa gi letolata boti sipi bo komopa'a molo letoto to Hu'mamofihi gobisalo foya amuya moloto lilatanamofihi minalibe luto bona'i lali'i foipanati okala hu letalibe luto ya'ma ai henana hu'ehibe? Ai lali hiti gonamu tamu'a lolo huto'a fili'ehinamo ni'ibe. 18 To lali tegi huto lolo huloto'a keke'i luse'na kehelito fi taga hu etose'nagu buto folo'ehinamo ni'inaya yana'mu bona'i lalitoga fi taga hu epelelata nasana ya'ma huto hu limilenogo lehe'moto lubuto bilina'mu yabe.